يعني ايه SMEs ؟
من المصطلحات اللي بنسمع عنها كتير في عالم البيزنس مصطلح الـ SMEs .. واللي بيقصدوا بيه المؤسسات الصغيرة والمتوسطة؛ ودي الشركات اللي بتكون إيراداتها أو أصولها أو أعداد الموظفين فيها بتقل عن مستوى معين.
وكل بلد بيكون ليها المعايير اللي بناء عليها بيتم تعريف الشركات الصغيرة والمتوسطة، واللي أوقات كمان بتختلف من صناعة للتانية، وإن كانت في معظم الدول بيكون عدد الموظفين فيها لا يزيد عن 250 موظف.
وأغلب البلدان بتكون الشركات الصغيرة والمتوسطة هي الأغلبية العظمى من الشركات، واللي بتوفر تقريبا تلتين الوظايف المتاحة حول العالم.
ولو بصينا لقوة اقتصاد أي دولة هنلاقي إن من أقوى أسباب نموه هو نمو الشركات اللي موجودة في الدولة دي، عشان كدا بيكون في دعم قوي من الحكومات للشركات دي عشان تسهل عليها عملها، واللي هيعود بالنفع على نمو الاقتصاد، ومع ذلك فالشركات الصغيرة والمتوسطة عندها تحديات كتير، وهو ده اللي هنوضحه في مقالة تانية بإذن الله.
