البداية

دايما البداية بتكون أصعب خطوة .. لأنك مش عارف هتروح فين وتمشي ازاي .. أفتكر مع بداية تخرجي من الجامعة واللي كانت بعيدة جدا عن مجال البيزنس (كلية أصول الدين) .. سألت نفسي زي أي حد هو أنا هشتغل في أنهي مجال .. خصوصا إني كنت داخل الكلية كهواية شخصية ومكنتش حابب أكسب فلوس من التخصص ده ..  وقتها كان من المجالات اللي بيتردد صداها بين الناس هي التسويق .. فقررت أستكشف المتاح لحد ما استقريت على التسويق 

وهنا ظهر التحدي .. أعمل ايه عشان أكون متخصص في التسويق وأنا أصلا معرفش حد في المجال .. ودراستي بعيدة تماما عن الموضوع ومفيش حد يقولي هو الطريق منين ..

فبدأت أدور على كورسات تسويق .. وأحاول أوصل لأي حد بيتكلم في الحته دي .. وأدور أونلاين وفي دايرة علاقاتي .. بس صدقني الطريق مكنش سهل .. والمجهود اللي اتبذل كان كبير .. أخدت وقتها كورسات كتير جدا .. بس ترتيبها كان غلط .. وأخدت كورسات تانية كان محتواها ضعيف .. وأخدت كورسات كانت مفيدة جدا بس في مرحلة متقدمة شوية .. وسافرت أسبوعيا من القاهرة لاسكندرية لمدة سنة كاملة عشان أدرس في الأكاديمية البحرية .. وفضلت أروح من أكتوبر لمدينة نصر مرتين أسبوعيا لمدة سنة تانية – عشان اتعلم حاجات جديدة

المشوار كان صعب لحد دراسته في الجامعة كلها بالعربي وآخر علاقة ليه بالإنجلش كانت في ثانوي .. وفجأة بقى دراسته كلها بالإنجلش ومصطلحات علمية أول مرة يسمع عنها .. بقيت أترجم وأتعلم وأحفظ المصطلحات الجديدة .. لحد ما ربنا كرمني

 صحيح الرحلة مكنتش سهلة بس كانت ممتعة .. ولأني مؤمن جدا إن السعي دايما بييجي بنتايج إيجابية – مش لازم تبقى زي ما احنا عايزين بس بتكون أنسب لينا في الوقت ده ودا اللي بنفهمه بعدين – .. وصحيح اترفضت من عشرات المقابلات الوظيفية .. وال CV بتاعي متفتحش في وظايف تانية كتير .. لدرجة إن حد مرة قالي “أنت كلامك بيدل إنك حد فاهم وعارف أنت بتعمل ايه .. بس أنا أخاف أعينك معايا وأنت مجال دراستك بعيد عن البيزنس والتسويق!” .. ورغم صعوبة الكلام وقتها بسبب كتر التدوير وخصوصا لما يكون الناس اللي حواليك شايفه إن اللي بتعمله ده تضييع للوقت والمجهود .. زي واحد أعرفه قالي مرة “مش كنت بفلوس الكورسات دي دخلتلك جمعية ولا عملت بيها حاجة تنفعك!” إلا إن فضل ربنا كان كبير

ورغم صعوبة الرحلة بس كانت دافع كبير إني أسعى أكتر وأبذل كل اللي أقدر عليه .. لحد ما توفيق ربنا وصلني للوضع اللي أنا فيه النهادرة .. عايز أقولك اتعرفت في الرحلة دي على ناس ساعدتني وفهمتني وقالتلي على الطريق .. وناس دورت ليا على فرص عمل .. وناس بقوا أصحابي .. وناس اشتغلت معاهم .. هي رحلة بتبدأها وأنت مش عارف نهايتها ايه بس المتعة في التفاصيل!

عشان كدا وبعد ما ربنا أكرمني ومن عليا بالخبرات والمعرفة اللي عندي النهاردة كان جزء من شكر النعمة دي إني أوضح الطريق لأي حد عايز يدخل المجال ويتخصص فيه .. إني أخده خطوة خطوة .. أشرحله بالتفصيل .. ازاي يبدأ وازاي يتحرك .. لحد ما يتحول من كونه شخص تايه مش عارف الطريق .. لشخص عنده القدرة على نفع نفسه ونفع اللي حواليه بإذن الله ..

إني أسعى لمساعدة كل صاحب مشروع بتطوير مشروعه أو بمساعدته في حل تحدي بيواجهة أو بنصيحة عامة يستفيد منها بما يتناسب مع ظروفه ..

وعندي هدف هسعى ليه من خلال المنصة دي بإذن الله .. إني أوصل للناس الشاطرة والمؤثرة واللي بيُشهد ليهم بالعلم والخبرة إنهم يشاركوا ويساهموا معانا بخبراتهم ويساعدونا ننشر العلم ده بشكل أكبر لفئات وشرايح أوسع .. واللي هيكون من أهدافنا فيه بإذن الله هي نشر العلم ده بلغتنا عشان نساهم في زيادة المحتوى العربي .. ونكون مرجعية لكل صاحب مشروع عشان يستفيد في مشروعه أو واحد مبتدئ بيدور على نقطة البداية وعايز يعرف الطريق ازاي