سيرتك الذاتية .. هي بوابتك للدخول للشركات!

رغم إني مش متخصص في مجال الموارد البشرية لكن كنت بشوف سير ذاتية كتير سواء لناس أعرفها بشكل شخصي أو لناس مقدمة على وظايف، وللأسف بتكون السير الذاتية دي ناقصة معلومات كتير وغير مرتبة بشكل سليم، فكانت سبب في ضياع فرص على ناس كتير، فخليني هنا أحاول أتكلم عن أهم النقاط اللي المفترض تتوافر في السيرة الذاتية عشان تكون لائقة ومعبرة عن الشخص اللي بيدور على وظيفة

وبردو واحنا بنتكلم عن شكل الـ CV هنلاقي كتير من النقاط الخلافية زي الفرق بين ال CV وال Resume ؟ وأحط صورتي في ال CV ولا لأ ؟ واكتب التعليم قبل الخبرات ولا العكس؟ وهكذا؛ فعشان نخرج من النقطة دي هنتكلم عن النقاط الأساسية فقط – اللي هي المعلومات اللي مينفعش متكنش موجودة – واللي تخلينا نقدم نفسنا بالشكل اللائق والمطلوب

وفي البداية خلينا نأكد إن ممكن حضرتك تبقى حد محترف جدا في مجالك، وبسبب ضعف الـ CV تفقد فرص عمل كويسة لأنك معرفتش تظهر وتبرز مزاياك، ودي الواجهة اللي من خلالها الشركة هتاخد انطباعها الأول عنك!

فمش هيكون مقبول إن حضرتك تبعت شكل ال CV وهو مش متنسق أو وهو متصور بالموبايل .. وللأسف الشركة مش هتراعي ظروفك إنك كنت مستعجل أو بتقدم على وظايف كتير أو الجهاز عندك فيه مشكلة .. خصوصا إن ده هيدي انطباع للشركة بالإهمال وخاصة مع وجود سير ذاتية تانية لزمايل ليك مقدمين على نفس الوظيفة وأكثر احترافية ومهنية.

من الآخر سوق العمل مرتبط بالعرض والطلب، وطول ما الشركة شايفة إن المعروض ادامها كتير هترفع من طلباتها عشان توصل لأحسن اختيار من وجهة نظرها.

وبردو فكرة إن الـ CV يكون عربي فده بقى غير مقبول عند الغالبية العظمى من الشركات – سواء كان تفكير منطقي أو غير منطقي أو شايفينها صح أو غلط بس ده الواقع – لأن الشركات بتتعامل إن الإنجليزي هو لغة البيزنس، اللهم إلا في بعض المجالات المحدودة وبعض الشركات، فالأساس إن ال CV يبقى مكتوب باللغة الإنجليزية، ولو هيتعمل عربي فده هيكون في نطاق محدود.

وعشان نتكلم عن الـ CV بشكل مرتب فاحنا بنتكلم عن عدة عناصر

1- Profile

وهي المعلومات الأساسية الخاصة بيك زي اسمك، ورقم تليفون تكون بترد عليه، وإيميل بتدخل عليه باستمرار وفاكر الباسورد بتاعه، ويفضل يكون إيميل احترافي مكون من أول حرف من اسمك واسم العيلة بدون إضافات تانية كتير.

والعنوان اللي أنت ساكن فيه بشكل عام مش تفصيلي، زي اسم الحي أو المدينة والمحافظة، وهنا في نقطة مهمة وأنت بتتكلم عن العنوان؛ وهي في حالة لو الوظيفة اللي أنت مقدم عليها في مكان بعيد عن مكان سكنك – زي إنك تكون مثلا ساكن في محافظة من محافظات الدلتا وهتروح شغل في القاهرة – فهنا أنت محتاج توضح إنك معندكش مشكلة إنك تنتقل لمكان العمل من خلال إنك تضيف جنب العنوان “Willing to relocate“

أما لو كان مكان العمل غير مناسب ليك فمن فضلك متقدمش أصلا، وتضيع وقتك ووقت الناس اللي هتابع معاك

وبردو وأنت بتتكلم عن المعلومات الخاصة بيك في معلومات بيتم إضافتها وهي في الحقيقة ملهاش لازمة زي رقم البطاقة والجنسية والنوع، خصوصا طالما بتقدم على شركة في نطاق بلدك لأن الشركة مش هتستفيد حاجة من المعلومات دي إلا لو كانت من متطلبات الوظيفة!

2- Summary

ودي ملخص بسيط عنك بتحاول من خلالها تقول ملخص خبراتك فيها، وفي الحقيقة هي مهمة مش حشو كلام وخلاص، فاهتم بإنك تكتب كلام منطقي يعبر عنك مش قص ولزق من أي حته، أو كتابة كلام لا يمت لواقع مهاراتك بصلة

3- Education

وأنت بتتكلم عن التعليم محتاج توضح اسم الكلية، ومجال التخصص، واسم الجامعة، والتقدير العام، وعدد سنوات الدراسة دخلت امتى واتخرجت امتى – زي مثلا من سبتمبر 2020 لـ مايو 2024، والسبب في النقطة دي إنك لو حديث تخرج فمفيش معايير واضحة للشركة تقيمك عليها سوى تقدير الكلية بتاعتك، فمحتاجه تعرف أنت كنت بتنجح بتقدير ولا قعدت مدة أطول من اللي مفروض تقضيها في الكلية

4- Experience

وطبعا الترتيب المنطقي ليها من الأحدث للأقدم، وهنا بردو بتذكر المسمى الوظيفي واسم الشركة واشتغلت فيها من امتى لامتى عشان تقدر الشركة اللي أنت مقدم عندها تحدد هل أنت شخص سريع التنقل من شركة لشركة ولا معدلات التغيير بتاعتك طبيعية، وفي نقطة مهم جدا إنك تتكلم عنها في نقطة الخبرات وهي الإنجازات اللي أنت حققتها خلال فترة عملك، ولو مكنش في إنجازات تذكر فعلى الأقل تكتب طبيعة المهام الوظيفية لأن أوقات كتير بيتكتب مسميات وظيفية وطبيعة المهام بعيدة كل البعد عنها

5- Skills

تعتبر من أكثر النقاط اللي بيتم التساهل فيها وكتابة بيانات غير حقيقية، وللأسف لو تم الكذب فيها، فبسهولة جدا تتكشف في الانترفيو لأنه ببساطة هتتسأل بناء على ايه كتبت الكلام ده، فحاول تخليك واقعي وتكتب اللي أنت عارف إنك بتعرف تعمله بجد

النقطة التانية هنا؛ إن في مهارات معدش ليها لازمة زي “Work under pressure” هي أصلا بيئة العمل كلها ضغوطات، فليه تزود الضغط على نفسك، أو إنك تكتب مثلا إنك بتجيد استخدام الكمبيوتر، كونك أصلا مبتعرفش تستخدم الكمبيوتر مع ثورة الذكاء الاصطناعي فدي مشكلة كبيرة جدا لازم تعالجها لأن التطور التكنولوجي سريع جدا ولازم تبقى مواكب للتغيرات دي وإلا هتفقد مكانك في سوق العمل

نقطة أخيرة؛ مش عيب إنك تستخدم الذكاء الاصطناعي في كتابة السيرة الذاتية الخاصة بيك ولكن العيب إنك متصبغش ده بصبغتك الشخصية فيبان إن الكلام كله مكتوب بالـ AI .. لأن سيرتك الذاتية هي نسخة مبدئية من الصورة الذهنية اللي بتحاول تصدرها للشركات .. فحاول دايما تحافظ على إن الانطباع الأول يكون إيجابي عشان تعزز من فرص مشاركتك في مقابلات عمل أكتر .. أو على الأقل تحظى بالاحترام والتقدير إن كان هناك من هو أنسب منك.

في عناصر تانية كتير مهمة بتختلف حسب خبرات كل شخص، لعل نتكلم عنها في مقال تاني ولكن حاول تهتم بالتفاصيل اللي تساعد توصل للشكل الاحترافي عشان تعرف تقدم نفسك بالشكل المطلوب.