آليات قياس حجم السوق
حجم السوق من أهم العوامل اللي بتأثر على عملية تحديد الأهداف واحنا بنعمل الخطة التسويقية بتاعتنا.
وده لأن التغيرات في حجم السوق بتؤثر على قرارات التوسع والانكماش بشكل كبير، وكمان توجيه الاستثمارات بتاعتنا في الأنشطة التسويقية المختلفة زي التوسع في الفروع والتوزيع أو الدعاية، وكمان برامج الولاء للعملاء.
لأن بمنتهى البساطة لو السوق اللي أنت شغال فيه كبير وبيزيد بمعدل سنوي مناسب، فأنت عندك فرصة للتوسع في حجم أعمالك، وزيادة رأس المال المستثمر بما يتناسب مع حجم السوق ومعدلات النمو السنوية، وعلى العكس تماماً لو السوق حجمه صغير أو بينكمش بمعدل كبير فالفرصة في التوسع بتكون شبه منعدمة
وبالرغم من وجود استراتيجيات مختلفة في كل حالة منهم سواء التوسع أو الانكماش إلا إننا في البوست ده بنتكلم عن آلية قياس حجم السوق، بعد ما وضحنا أهميته
ازاي أعرف حجم السوق؟
عشان تعرف تحدد حجم السوق بتاعك ففيه طريقتين هنتكلم عنهم
- الطريقة الأولى: وهي الطريقة الأسهل، بس للأسف مش دايما بتكون متاحة، وهي إن بيكون فيه جهات رسمية بتصدر بيانات عن السوق وحجمه بشكل دوري، والجهات دي بتكون:
الوزارات – مراكز دعم القرار – الغرف التجارية – منظمات تجارية عالمية – مراكز أبحاث تسويقية – إلخ
ومع سهولة الطريقة دي لكن في السوق المصري بنواجه صعوبة في الوصول للمعلومات دي إما لعدم توافر المعلومات بشكل سهل أو بسبب البيروقراطية المنتشرة.
- الطريقة الثانية : Chain Ratio Method
في الطريقة دي بنقدر نحسب حجم السوق من خلال حصر مجموعة من العوامل المتغيرة واللي بنقدر من خلالها نحدد حجم السوق بشكل تقريبي
مثال: لو افترضنا إننا عندنا شركة عقارات ومحتاجين نقيس السوق بتاعنا، فاحنا هنا محتاجين نعرف حجم المال الذي يمكن استثماره في السوق ده عشان نقدر نقيس هل السوق بيكبر ولا العكس
1- فهنعتبر إن عدد السكان في مصر = 100 مليون نسمة
2- وإن عدد السكان اللي سنهم أكبر من 25 سنة = 40 مليون
3- وإن عدد السكان اللي دخلهم السنوي أكبر من 200 ألف جنيه مثلا هو = 8 مليون فرد
4- وبافتراض أن عدد الوحدات التي يمكن لكل فرد شرائها هي = وحدة واحدة
5- متوسط سعر الوحدة = مليون جنيه
كدة يبقى حجم السوق =
إجمالي عدد السكان اللي دخلهم أكبر من 200 ألف * متوسط سعر الوحدة =
8,000,000 * 1,000,000= 8 مليار جنيه مصري (الأرقام هنا خاصة بالمثال التوضيحي ولا تمثل الواقع)
تاني خطوة هتكون إني أعرف نسب التغير في المعايير اللي أنا اخترتها عشان أحسب السوق بيكبر ولا بيصغر، زي مثلا معدل الزيادة السنوية للسكان ومعدل الزيادة في الدخول والأجور.
وبكدة أنا بقى عندي تصور مبدئي لحجم السوق وأقدر أشوف السوق بتاعي بيكبر ولا بينكمش وأعرف أتحرك فيه ازاي، مع العلم أن العوامل السابقة متغيرة من صناعة للتانية.
