استراتيجيات بناء السمعة

اتكلمنا قبل كدا عن مصطلح ال Brand Reputation ووضحنا إن المقصود بيه، هو الطريقة اللي بيتم بيها النظر إلى العلامة التجارية من العملاء وأصحاب المصلحة، وكل ما كانت سمعة العلامة التجارية جيدة، فده دليل على ثقة المستهلكين فيها وشعورهم بالرضا اتجاه منتجاتها أو خدماتها، طب ازاي أنا كصاحب بيزنس أبني السمعة دي؟ في الحقيقة عملية بناء السمعة ليها متطلبات كتير ولكن يمكن تلخيصها في أهم 3 استراتيجيات ممكن من خلالهم نحسن من الصورة الذهنية للعلامة التجارية؛ الاستراتيجيات دي هي:

1- الأمانة والصراحة

دايما الناس بتحب الأمانة والصراحة، عشان كدا متوعدش بحاجة متقدرش تقدمها، ودايما بتكون القاعدة هنا “أعط وعود قليلة وقدم خدمات أفضل” لأن وعدك عبارة عن توقعات أنت بتزرعها في ذهن العميل، فلو كانت وعودك لا تقابل توقعاته هتفقد كتير من مصداقيتك.

2- أظهر القيمة الموجودة في منتجاتك أو خدماتك

كثرة الممارسات التسويقية اللي بيمر بيها العملاء على مدار يومهم بيخلي عندهم القدرة على التمييز بين العلامات التجارية المختلفة، عشان كدا لازم يبقى في قيمة حقيقية موجودة في منتجاتك العملاء بتوعك شافينها ومدركينها، وزي ما كان بيقول كوتلر أستاذ التسويق “لو مكنش عندك ميزة تنافسية يبقى الأفضل التوقف عن المنافسة”

3- اتكلم مع عملائك بشكل مباشر

الكلام مع العميل ليه أكتر من فايدة، أولا بيحس إنك مهتم بيه ومهتم بآراءه وده هيزود ثقته فيك، تاني حاجة إنه هيخليك على اطلاع بشكل دائم على احتياجات السوق، وكمان هيخليك تاخد بالك من المشاكل الموجودة عندك فهيكون عندك القدرة على علاجها، عشان كدا مهم إنك يكون عندك CRM تقيس بيه مدى رضى العملاء بتوعك، والمقصود بالـ CRM هو برنامج إدارة العملاء وإن كان المقصود هنا مش السيستم ولكن الاستراتيجية الكاملة اللي من خلالها هيتم التواصل مع العملاء وسماع آرائهم وتنفيذها.

عملية بناء السمعة عملية طويلة وشاقة وتحتاج للكثير من الجهد، عشان كدا مش هتتحقق في يوم وليلة ولكن هيتم بناءها كل ما قدمت خدمات فيها قيمة أفضل من وجهة نظر العملاء، وسعيت لتلبية احتياجاتهم بالشكل اللي يرضيهم.