ما هو الدور الحقيقي للتسويق الذي تغفل عنه الكثير من الشركات ؟
كام مرة وأنت ماشي في طريق لأول مرة ومعتمد في طريقك على الـ GPS وفجأة فصل منك عند مفترق طرق .. فاضطريت تاخد أحد المسارين ولكن بعد شوية أدركت إنه المسار الخطأ .. هنا بتكون تكلفة العودة للمسار الصحيح هي إنك تلاقي أقرب دوران ترجع منه .. وأوقات بيكون على مسافة بعيدة بتضطر معاها ترجع كتير عشان بس ترجع لمسارك الطبيعي .. طب تخيل معايا لو مفيش حد يصحح ليك الطريق أو الـ GPS فضل عطلان ومبقتش عارف الصح فين وكمان مفيش حد تسأله فيقولك الطريق ازاي !
أهو نفس السيناريو ده بيحصل معانا في البيزنس بدون الاهتمام بالتسويق .. وده ببساطة لأن التسويق ليه عدة أدوار محورية بتأثر على البيزنس بشكل كبير .. وعدم إعطاءه الأهمية قد يتسبب في حالة عامة من الوقوع في القرارات الخاطئة واللي بيكون اكتشافها أصعب بكتير من التيه أثناء القيادة .. لأن الوقت اللي بنكتشف فيه الخطأ أوقات بيكون صعب معاه الرجوع مرة تانية .. لأن بيئة العمل سريعة ومتغيرة ومؤثرة .. عشان كدا مهم تبقى عارف ايه هي أهمية التسويق للشركة .. وهنا مقصدش الأهداف المباشرة زي زيادة الوعي بالعلامة التجارية أو الترويج للمنتجات وزيادة المبيعات ولكن في أهداف تانية في الحقيقة هي أعمق وتأثيرها أكبر واللي ممكن نلخصها في عدة نقاط كالآتي:
- التسويق هو الدفة الموجهة للبزنس
أساس عملية اتخاذ القرار هي وجود معطيات .. ومن أهم الأمور التي يهتم بها التسويق هي دراسة طبيعة السوق المتواجد فيه البزنس ودراسة سلوك العميل وطبيعة المنافسة .. واللي على أساسهم يتم بناء الاستراتيجية اللي من خلالها هتتحرك الشركة في السوق .. فيساعد في بناء الميزة التنافسية وزيادة القيمة المقدمة للعملاء .. ومن غير معرفة المعلومات دي هتكون الشركة أشبه بقائد السيارة اللي وقف قدام مفترق الطرق ومكنش عارف الطريق ازاي فهتكون خطواته عشوائية ومش هيدرك صحتها من خطأها غير متأخر .. وبالتالي عملية التصحيح هتكون أصعب وزي ما قال Seth Godin
يوجد تأخير بين الوقت الذي يحدث فيه خطأ وما بين ملاحظتنا له.
- توافق أهداف البزنس مع واقع السوق
ودا مش هيحصل إلا من خلال ضمان أن تتوافق رؤية الشركة مع احتياجات العملاء واتجاهات السوق وطبيعة المنافسة .. أوقات أصحاب البزنس بيكون عندهم بعض القناعات أو بيكون ليهم رؤية معينة من خلال طرح منتج معين أو التوجه في اتجاه معين .. ولو قرر صاحب البزنس إنه يتحرك بدون ما تكون رؤيته متوافقة مع ظروف السوق هتكون خسارته لموارده أسرع مع رفض السوق ليه اللي قد يتسبب في إغلاق البزنس بالكلية.
- صياغة القيمة المقدمة للسوق
التسويق بيساعد البزنس في صياغته للقيمة المقدمة للسوق .. ودا من خلال عمل ميزة تنافسية تميز الشركة عن المنافسين واللي بنجاوب فيهم عن سؤالين:
- ليه العميل هيختارنا احنا ومش هيختار المنافسين؟
- ايه هي القيمة اللي هقدمها مختلفة عن الموجود في السوق؟
والإجابة على السؤالين دول هما اللي بيرسموا الصورة الذهنية اللي الشركة بتسعى لترسيخها
- تعزيز قيمة العلامة التجارية على المدى الطويل
من الحاجات اللي ناس كتير بتغفل عنها إن التسويق بيساهم في بناء قيمة العلامة التجارية (Brand Equity) — وهي أصل غير ملموس يتزايد تأثيره بمرور الوقت. واللي بيساعد البزنس بعد كدا إنه
- يسعر منتجاته أعلى من المنافسين
- بناء ولاء العملاء، اللي بيقلل من تكاليف الاستحواذ على عملاء جديدة
- جذب المواهب والمستثمرين والشركاء.
من الناحية الاستراتيجية، التسويق هو الجسر بين رؤية الشركة والتنفيذ على أرض الواقع يضمن إن أهداف الشركة طويلة المدى
- قابلة للتكيف مع التغيرات
- متجذرة في السوق
- معلنة بشكل جذاب
التسويق هو المحرّك الذي يدفع الشركة للنمو، ويبني علاقات فعالة مع العملاء، ويضمن النجاح على المدى الطويل!
